སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
མཁས་རློམ་དྲེགས་ལྡན་ཚོགས་ཀྱི་སྙན་དུ་གསོལ་བ།
སྤེལ་དུས། 2016-07-04   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  གཟན་དཀར་ཐུབ་བསྟན་ཉི་མ།

ཀ་ཁ་ཙམ་གྱི་སྦྱོར་ཀློག་མི་མཁྱེན་པར།།

ཁ་ནས་བོད་ཀྱི་རིག་གཞུང་འདིའོ་ཞེས།།

ག་ས་གང་ལ་ངར་སྐད་སྒྲོག་བྱེད་པའི།།

ང་རྒྱལ་སེང་གེའི་སྡེར་མོ་བགྲད་ལ་ལྟོས།།

                                     

ཅ་ཅོ་ཡིད་མཐུན་གཏམ་གྱིས་མི་མགོ་བསྐོར།།

ཆུ་ལུགས་ཞི་དུལ་ཚུལ་གྱིས་མི་མགོ་བསྐོར།།

ཆ་ལུགས་ཞི་དུལ་ཚུལ་གྱིས་གཞན་སྣང་བྲིད།།

ཇ་ཆང་དགྱེས་དགུའི་མཆོད་པས་མཉེས་བྱེད་པའི།།

ཉ་པའི་སྒྱུ་ཐབས་མཁན་རྣམས་བག་ཟོན་མཛོད།།

                                  

ཏ་ལའི་ལོ་མར་བྲིས་པའི་དཔེ་རྙིང་རྣམས།།

ཐ་ན་ཀློག་སྟངས་ཅི་ཡིན་མི་ཤེས་མོད།།

ད་དུང་ཁོ་བོས་ཞིབ་འཇུག་བྱེད་དོ་སྐད།།

ན་ཆུང་ཕོ་རྒོད་ཅན་རྣམས་ཡིད་རེ་འཁྲུལ།།

                                

པ་ཏྲ་བསླབ་པ་ལྟ་བུའི་གཡོ་སེམས་ཀྱིས།།

ཕ་རོལ་དབང་དུ་སྡུད་ལ་མཁས་མོད་ཀྱི།།

བ་གླང་ས་བརྐོས་རང་གཉར་བླུགས་པ་བཞིན།།

མ་བོས་སྡུག་བསྔལ་མགྲོན་དུ་ཁུག་ལ་གཟིགས།།

                                        

ཙ་མ་ར་ལྟར་དྲེགས་ལྡན་ཁུ་བོ་ཡིས།།

ཚ་བོ་ཉམ་ཐག་བརྩེ་བས་ཡལ་བོར་ནས།།

ཛ་ལང་དྲག་ཤུལ་སྤྱོད་པས་གཙེ་བྱེད་ན།།

ལྦ་སྐྱེས་རྒྱལ་པོར་བསྐོས་དང་ཁྱད་པར་ཅི།།

                                

ཞྭ་དཔེ་ལྷམ་འགེབ་བྱེད་ལ་རིག་པ་རྣོ

ཟ་འཚོལ་རྙེད་སྡུད་ལས་ལ་བློ་གྲོས་གསལ།།

འ་འོལ་གཡོ་སྒྱུའི་བྱ་བར་རྟག་བརྩོན་པའི།།

ཡ་མེད་ཅན་ལ་སུ་ཞིག་ཡིད་རྟོན་བྱེད།།

                                       

ར་མིན་ལུག་མིན་རྒྱ་མིན་བོད་མིན་གཞུང་།།

ལ་ལུང་མང་པོར་འགྲེམ་སྤེལ་བྱེད་པ་ལས།།

ཤ་ཚ་སྙིང་རྗེའི་སེམས་ཀྱིས་རང་རིགས་ལ།།

ས་སྟེང་ཚན་རིག་ནོར་གྱིས་བཀང་ན་ལེགས།།

                                    

ཧ་ཅང་བདེན་གཏམ་བཤད་ན་ཀུན་ཡིད་དཀྲུགས།།

ཨ་གསར་ལྕེ་གཉིས་རྐྱོང་ལ་འཛུམ་ཡིད་འཕྲོད།

ཧ་ཅང་སྙིགས་མར་གྱུར་པའི་ཚུལ་འདི་ལ།།

ཨ་ཁ་ཐེ་ལེ་བརྡུང་བས་ཅི་ལ་ཕན།།

 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:jiangbai@126.com
ཁ་པར།:010-58336716