སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
དུར་མཆོད་ཀྱི་ཁ་བ།
སྤེལ་དུས། 2016-07-06   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  སྨྲེང་བུ།

སྐབས་དེ་དུས།

བསང་ཆུ་སྔ་མོ་ནས་འཁྱག་པས་བསྡམས་སྲིད།

སྐབས་དེ་དུས།

ལོ་གསར་གྱི་ཤོག་སྦག་ད་དུང་གྲགས་ཀྱིན་པའི་སྒང་ཡིན།

སྐབས་དེ་དུས།

སྙན་ངག་པ་ཚོའང་ཆང་གིས་རབ་རིབ་སྦྲིད་ཡོད་སྲིད།

ཏག་ཏག    སྐབས་དེ་དུས།

ཁྱོད་ཁ་རོག་གེ་ར།    ཁུ་སིམ་མེར།

གཞི་ནས་ཐང་ཆད་པའི་ལོ་ཟླ་ལ་འཐབ་མཚམས་བཞག་སྟེ།

སྙན་ངག་གི་རྡོག་ཁྲེས་ལྷག་མ་དེ་འཁུར་ནས།

ཆང་དང་རྨི་ལམ་གྱི་གཤོག་པར་འཁེན་ཏེ།

ཁེར་རྐྱང་གི་དྲོད་ཐིག་ཅིག་སྒོམ་བཞིན།

སུ་ཡང་འགྲོ་མི་འདོད་པའི།   སུ་ཡང་འགྲོ་ཆོས་པའི།

ཡང་ན་འགྲོ་མ་རན་པའི།   སུས་ཀྱང་ཉན་མི་འདོད་པའི།

ཕྱི་མ་བར་དོའི་ཕྲང་ལ་ཆས་སྐད།

ཁྱོད་འཇིག་རྟེན་དཀར་ངོགས་སུ་འཚོ་དུས།

ཁྱོད་ཀྱིས་གཞུང་རྒྱུ་ལྐོག་ཟ་བྱས་མེད།

ཁྱོད་ཀྱིས་རྒྱུ་འབྲས་གོ་ལྡོག་བྱས་མེད།

ཁྱོད་ཀྱིས་སྔར་བཞིན་ཁ་རོག་གེར།    ཁུ་སིམ་མེར།

ཆང་དང་རྨི་ལམ་གྱི་གཤོག་པའི་གསེབ་ཏུ།

སློབ་བུ་རྣམས་ལ་དཔྱིད་ཀའི་སློབ་ཚན་ཁྲིད་ཀྱིན།

རང་གི་ལུས་རྟེན་ཙམ་ཞིག་ཤོང་བའི་ཁང་མིག་ཏུ་བསྡད་སྐད།

 

དོ་ནུབ།   ལྷ་སའི་བུམ་པ་རི་ལ་ཁ་བ་ལྷབ་ལྷུབ་འབབ་ཀྱིན་འདུག

སྨྲེང་བུས་གཞན་གྱི་དུར་མཆོད་ཀྱི་དུས་ཚོད་དེ་གཡར་ནས།

ངོ་མ་ཐུག་པའི་ཁྱོད་ལ་ནས་ཆང་ཕོར་གང་འདྲེན་གྱིན་ཡོད།

 

སྙན་ངག་པ།   སེམས་པ་མ་སྐྱོ།

སྙན་ངག་པའི་ལམ་བུ་དཀར་པོ་ཡིན།

ལམ་བུ་དཀར་པོ་དེད་དེ་སོང་དང་།

གྲོགས་མེད་ཁེར་རྐྱང་ཡིན་པར་མ་སྐྱོ་དང་།

རང་གྲོལ་ཁོང་ཡང་གཞོན་པའི་སྒང་ལ་བུད་སོང་བ་མིན་ནམ།

ཧེ་ཙི་ལགས་ཀྱང་གཞོན་པའི་སྒང་ལ་བུད་སོང་བ་མིན་ནམ།

དུར་མཆོད་དུས་སུ་ཆར་པ་ཟིམ་ཟིམ་འཇོ།

ལམ་གྱི་འགྲུལ་པའི་གདུང་བ་དྲག་ཏུ་འཕེལ།

ཆང་ཁང་གར་ཡོད་གཏམ་དུ་དྲིས་པའི་ཚེ།

ཤིན་ཧྭ་གྲོང་ཚོར་ཡོད་ཅེས་ན་ཆུང་སྨྲ།

                         ཚིགས་བཅད་འདི་ནི་ཐང་གི་སྙན་ངག་པ་ཏུའུ་མོས་བྲིས་པའི།

དུར་མཆོད་ཀྱི་སྙན་ངག་ཅིག་ཡིན།

སྙན་ངག་འདི་ནི་ཉི་མ་ལྷ་སའི་ཕྱོགས་ནས།

ཁྱོད་ལ་བཏེགས་པའི་འཕྱིས་དྲགས་པའི་སྐྱེས་ཆུང་ཙམ་མོ།

 

ཉི་མ་ལྷ་སའི་ཕྱོགས་ནས།

ཁྱོད་ལ་ནས་ཆང་ཕོར་གང་འདྲེན་དུས།

ཕྱི་རོལ་དུ་ལྷབ་ལྷུབ་འབབ་པ་དེ།

ཟིམ་ཟིམ་ཆར་བ་མ་རེད་ཁ་བ་རེད།

 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:jiangbai@126.com
ཁ་པར།:010-58336716